Shkrimi i botur në vitim 2009 nga Brisida Gjikondi
E bukur, kurajoze, këmbëngulëse, me zgjuarsi natyrale por jo me shumë kulturë, ja kjo është Adelajda, personazhi goditës që komentohet aq shumë nga masa e gjerë e popullit në këtë klimë të nxehtë politike Rreth saj dhe çka përfaqëson ajo flitet më me ëndje se për personazhet dhe përplasjet politike prag-zgjedhore dhe kjo është e kuptueshme në një vend të tejlodhur si Shqipëria.
Personalisht e çmoj Adelajdën dhe çka përfaqëson ajo. Le të jemi të gjithë të sinqertë dhe të pranojmë që ajo s’është as një personazh telenovele as Shkurte Pal Vata por thjesht një vajzë e provincës shqiptare e fillim-shekullit të 21 që GUXOI. Po po guxoi të thyejë tabutë e qyteteve shqiptare me një rrugë, ku të gjithë njohin të gjithë dhe ku të gjithë kushtëzojnë jetën e tjetrit dhe anasjelltas.
Guxoi, duke marrë parasysh dhe duke sakrifikuar dhimbjen e prindërve të saj, guxoi duke treguar se ajo s’mund të mbart në vetvete dhe s’mund të tërheq zvarrë fatin e saj të parashkruar, si shumë e shumë simotra të saj shqiptare. E paragjykojnë, e injorojnë me dashje, e mburrin, e kritikojnë, e analizojnë gati të gjitha femrat shqiptare por gjithsesi e konsiderojnë dhe kjo s’është pak, ajo ekziston.
Ajo arriti që nga një vajzë e hasëshme në të gjithë Shqipërinë të rebelohet dhe t’i tregojë gjithë dynjasë se ajo s’jeton për të pasur rehati, luks, burrë bukuran dhe një shpirt të zbrazur nga monotonia e fatit të parashkruar nga të tjerët, JO ajo vetëvendosi për rrugëtimin e saj qoftë ai dhe i gabuar. Gënjen ai kush thotë që Kavaja nuk paragjykon, Kavaja dhe gjithë Shqipëria e tanishme paragjykon, sulmon, fundos kë si Adelajda rebelohet dhe del mbi monotoninë e fatit të paragjykuar.
Nuk po flas këtu për vajzat bukurane të Bllokut, as për pasunaret e Kavajës, Durrësit, Shkodrës, Vlorës që kanë mundësi dhe që arsimohen nëpër Evropë, JO po flas për shtresën, nivelin dhe çka përfaqëson Adelajda si fenomen. Nga vajza kurajoze si Adelajda kanë ardhur shumë personalitete të forta të emancipimit femëror. Çmoj Adelajdën, vetëdijen dhe vërtetësinë e saj paksa të kompleksuar, asnjëherë se dëgjova të shante me cinizëm mbrapa krahëve ata që e sulmuan por dhe që i vuri përpara dhe dolën para saj.
Jam me Adelajdën pasi jam përherë me femrat që guxojnë, jam me Adelajdën dhe me nënën e saj të tkurrur, jam me femrën shqiptare të shekullit të 21. Si Qetësori, Bjordi dhe Adi has shpesh ndër Shqipëri janë meshkujt shqiptarë që mbijetesën ja u ka lehtësuar fati dhe emancipimi brenda llojit, kurajoze si Adelajda has pak, ajo tashmë është fenomen.
