Ndalimi i hyrjes së ministrit serb të Mbrojtjes, Aleksander Vulin në Kroaci ka nxitur masa reciprociteti nga Serbia. Qeveria serbe ka vendosur sot që ministri i Mbrojtjes i Kroacisë nuk do të jetë i mirëpritur në të ardhmen në territorin e shtetit serb.
“Qeveria serbe beson se këto veprime të Kroacisë janë kundër marrëdhënieve të mira fqinjësore dhe respektit reciprok të bazuar në vlerat evropiane, që përfshinë lëvizjen e lirë të njerëzve”, thuhet në komunikatën e qeverisë serbe.
Ky vendim i qeverisë serbe duket se do të acarojë edhe më shumë raportet mes Serbisë dhe Kroacisë, raporte këto që pësuan një goditje pasi kryetari i Partisë Nacionaliste, Vojisllav Sheshel, gjatë një vizite të delegacionit kroat në Serbi, shkeli dhe fyeu kroatët dhe simbolet e tyre.
