Policia e Tiranës ka arrestuar Bledar Matja, 47-vjeç pasi është dënuar nga Gjykata e Posaçme për katër akuza.
Mbi 47-vjeçarin rëndojnë akuzat e “Marrëdhënieve seksuale ose homoseksuale me dhunë me të mitur” kryer në bashkëpunim, “Shtrëngimi me anë të kanosjes ose dhunës për dhënien e pasurisë” dhe “Grupi strukturuar kriminal”.
“Në vijim të punës për kapjen e personave të shpallur në kërkim kombëtar, nga Sektori i Operacionales, në bashkëpunim me Komisariatin e Policisë Nr. 4, u bë kapja dhe ndalimi i shtetasit B. M., 47 vjeç, pasi Gjykata e Posaçme e Shkallës së Parë Kundër Korrupsionit dhe Krimit të Organizuar Tiranë i ka caktuar masën e sigurimit personal “Arrest në burg”, për veprat penale “Marrëdhënie seksuale ose homoseksuale me dhunë me të mitur”, kryer në bashkëpunim, “Shtrëngimi me anë të kanosjes ose dhunës për dhënien e pasurisë” dhe “Grupi strukturuar kriminal”, thuhet në njoftimin e policisë.
Mësohet se Matja bashkë me dy të tjerë Valter Hysja 21 vjeç dhe Fatmir Haxhia 20 vjeç tashmë të arrestuar, kanë kërcënuar një 14-vjeçar se do i publikonin videot intime që i kishin bërë, në rast se i mituri nuk do t’u jepte 5000 mijë euro.
I mituri ka marrë shumën e kërkuar nga tre të arrestuarit, tek tezja e tij, ndërsa kjo e fundit ka zbuluar krimin duke bërë denoncimin në polici. Ngjarja e rëndë ndodhi në korrik të vitit 2019.
