Javën e kaluar është shkarkuar kryeministri malazez, Zdravko Krivokapiç, i cili humbi besimin edhe të partnerëve të koalicionit që tashmë kanë nisur negociatat me partitë e tjera parlamentare për të formuar një qeveri të re. Lideri i Lëvizjes Qytetare URA, Dritan Abazoviq dhe drejtori ekzekutiv i partisë, Zoran Mikiq, biseduan me një sërë partish parlamentare për formimin e një “qeverisë evropiane”, të cilën e prezantuan si një nga modelet më të mira për tejkalimin e krizës politike në Mali i Zi.
Lëvizja bën me dije se të enjten, ndër të tjera, është organizuar një takim me përfaqësues të Partisë Demokratike të Socialistëve (DPS) të Milo Gjukanoviçin, të cilët, siç thonë ata,
“Paraprakisht i kanë dhënë mbështetje qeverisë evropiane, por që nuk do të jenë pjesë e kabinetit qeveritar. Takimi është mbajtur në ndërtesën e Presidencës, me Milo Gjukanoviçin, Danijel Zhivkoviçin dhe Ivan Vukoviqin, të cilëve u janë prezantuar prioritetet e qeverisë evropiane” – thuhet në komunikatën e URA-s.
Takime u zhvilluan edhe me partitë e tjera parlamentare duke përfshirë edhe përfaqësuesit politikë shqiptarë Fatmir Xheka dhe Nik Gjeloshajn. Theksojmë se zëvendëskryeministri i Malit të Zi, Abazoviç kishte deklaruar se së shpejti do të krijohet qeveria e re, e cila si prioritetet do të ketë luftimin e krimit dhe korrupsionit si dhe rrugën euro-atlantike.
Krivokapiç u shkarkua gjatë javës së kaluar pas shumë mosmarrëveshjeve me partnerët e koalicionit rreth rrugëtimit evropian ndërsa kishte shkaktuar edhe incidente diplomatike. Ndryshe, disa parti minoritare si dhe presidenti malazez, Gjukanoviç kanë pohuar se një prej kandidatëve të mundshëm për të qenë në krye të qeverisë është edhe Abazoviç, i cili ditë më parë kishte deklaruar se nuk i ik përgjegjësive edhe më të mëdha nëse i besohen.
