Nga Ahmet Zani
Më në fund, kërkuesit shkencorë të breshkave detare në Shqipëri, prof. dr. Idriz Haxhiu dhe doktorantja Vilma Piroli kanë përgjigje për këtë pyetje. Të njoftuar nga zoti Sokol Gjermeni, për gjetjen e gjurmëve të çuditshme në rërë mëngjesin e datës 19 qershor 2018 në plazhin e Divjakës, dy ditë më vonë studiuesit nisën kërkimin për zbulimin, nëse kishte të bënte vërtetë me një rast folezimi.
Me ndihmën e Sokol Gjermenit, ata gjetën gjurmët tashmë disi të zbehura nga shiu dhe era, por që mbeteshin të identifikueshme për shkenctarët si gjurmë të breshkës së llojit “Caretta Caretta”. Nga trajektoria e përshkuar, mënyra e lëvizjes dhe gjetja e folesë u qartësua e gjithë situata dhe u vërtetua që kemi të bëjmë me një rast folezimi të breshkës kokëmadhe “Caretta Caretta”. Në mënyrë që të mos ndodhë ndonjë dëmtim i folesë, studiuesit e mbajnë të fshehtë pozicionin e saj.
Për profesor Idrizin ky është një rast i veçantë, pasi ndonëse ai ka zhvilluar ekspedita për këtë arsye në këtë zonë 10 apo 20 vjet më parë, asokohe nuk ka gjetur asnjë shenjë folezimi dhe ky rast vërteton bindjen që ai kishte prej kohësh që folezimi në Shqipëri ndodh, por është sporadik.
Vilma Piroli, studiuesja në fushën e herpetofaunës dhe sidomos të breshkave detare, thotë se ky nuk është rasti i parë që tregon praninë e folezimit në Shqipëri, pasi raportime të tilla datojnë që prej vitit 2004 në Orikum, në vijim në vitin 2010 në Patok, 2014-2015 në Seman dhe 2017 në Kepin e Rodonit. Sipas saj, ky rast është i veçantë për ta, sepse është bërë dokumentimi i pranisë së folesë nga shkencëtarët, sepse të gjitha rastet e tjera kanë qenë raportime nga qytetarë, lëshim i vezëve në kushtet e stresit, fotografi të të vegjëlve ose vezë të gjetura në oviduktin e breshkës së ngordhur.
Shkenctarët ftojnë qytetarët të kontribuojnë në ruajtjen e këtyre gjallesave karizmatike dhe të shfaqura kaq herët në planet përmes raportimit të të gjithë rasteve të gjurmëve të evidentuara në rërë, breshkave të gjetura në breg apo në rrjetat e peshkimit në adresën e email-it [email protected], meqë ata janë të bindur që me kontributin e të gjithëve mund të vijojmë t’i kemi në planet edhe për shekujt e ardhshëm këta bashkëmoshatarë të dinosaurve.
