Kryeprokurori i Leçes: Emigrantët që zbarkojnë në brigjet italiane nisën nga Turqia e Greqia
“Nga Shqipëria mbërrijnë aktualisht vetëm lëndë narkotike, nuk vijnë emigrantë të bllokuar.”
Kjo është deklarata e kryeprokurorit të Leçes, Cataldo Motta gjatë një interviste radiofonike në programin “Zërat e mëngjesit” në Radio 1. I pyetur për mundësinë e mbërritjes së emigrantëve sirianë nga Shqipëria drejt Italisë, kryeprokurori i Leçes tha se nuk pritet asnjë fluks nga Shqipëria, sepse emigrantët nuk kalojnë as tranzit nga ky vend. Ai evidentoi me këtë rast faktin se nga Shqipëria vazhdojnë të vijnë skafistë e trafikantë me sasi të shumta droge.
“Me shumë gjasa mendohet se janë të njëjtit skafistë të epokës së kontrabandës brindizine, por dhe ky është një fakt relativ. Duhet kuptuar se ekzistojnë mjetet e mënyrat për të rinisur e për të përballuar trafikun e emigrantëe përmes Adriatikut. Në Shqipëri mbi të gjitha ekziston një ligj i përkohshëm, por i rinovuar disa herë, i cili ndalon zotërimin privat të mjeteve lundruese, skafeve e gomoneve etj. Pra, mjete detare për të transpotuar 25 mijë emigrantë nuk ekzistojnë”, ka thënë Motta.
