“Kazan mediatik” është emërtimi që kreu i qeverisë ka përdorur ndaj mediave, duke i bërë këto të fundit ta pranojnë tanimë pa refuzim e habi.
Por si duket në mesin e këtyre mediave që Rama fort i atakon ka edhe disa preferenca.
Ai sot ka ngrënë mëngjesin në Llogara me 3 gazetarë, Elona Meço nga Top Channel, Eljamonda Zotka e Tv Klan dhe Aristir Lumnezi i gazetës “Panorama.
Larg kritikave të tyre të vazhdueshme ndaj qeverisë, me një ton tejet miqësor gazetarët kanë diskutuar me kryesocialistin mbi turizmin por nuk kanë munguar edhe pyetjet mbi qeverinë e re.
Rama ka shpjeguar se përse nuk u përfshinë në kabinet Tahiri dhe Bregu.
“Kjo nuk është si puna e skuadrës kombëtare të futbollit, që qeveria është seleksion i atyre që do të hyjnë në fushë dhe të tjerët janë në stol. Kemi nevojë të kemi edhe partinë edhe grupin të fortë. Nëse një pjesë e kapaciteteve do të ishin ministra do të kishim probleme me grupin, qeveria ka nevojë për një grup të fortë në parlament”, kështu e ka shpjeguar Rama mungesën e Tahirit në listën ministrore.
Ndërsa rreth shkrirjes së Minstrisë së Integrimit, që u përfol se do të drejtohej nga Bregu Rama tha: “Është si puna e një trupi, më shumë peshë dhe mbipeshë nuk është se bëhet më shumë lëvizje dhe më shumë aktivitet. Në këtë rast do të spostojmë të gjithë pjesën e problematikave të integrimit që kanë të bëjnë përgatitjen e negociatave te ministria e Jashtme. Është një praktikë që e kanë disa vende, Hungaria nuk ka pasur asnjëherë Ministri Integrimi dhe është në BE. Kroatët e patën dhe e kaluan te e Jashtmja. Kur hapen negociatat vendoset një kryenegociator. Nuk është e nevojshme që të kesh një burokraci aq të madhe në vete, nuk është e domosdoshme, është një kalim te Ministria e Jashtme. Do të ketë një zëvendësministër që do të merret ekskluzivisht me integrimin.”
/tiranapost.al/
