“Informacionet e ambasadës janë një bazë për hetime konkrete”
Edhe Prokuroria e Përgjithshme paralajmëron hetime për gjyqtarët e korruptuar, që dyshohen se për këtë shkak iu është refuzuar apo anuluar viza nga Shtetet e Bashkuara të Amerikës.
Sikurse ministri i Drejtësisë apo Unioni i Gjyqtarëve, edhe organi qëndror i akuzës duket se është në pritje të listës së këtyre gjyqtarëve. Në një reagim për mediat, këshilltari i Prokurorit të Përgjithshëm ka thënë se “Prokuroria vlerëson çdo informacion për korrupsion në drejtësi dhe më gjerë, që mbërrijnë nga burime të besueshme. Ambasada amerikane është një ndër partnerët më të ngushtë të Prokurorisë në luftën kundër korrupsionit, ndaj dhe informacionet e saj për vepra të ndryshme penale kanë shërbyer si bazë për nisjen e hetimeve konkrete”. Këtë javë, u mësua për ekzistencën e një liste me emrat e gjyqtarëve, të cilët kanë aplikuar, ose do t’u refuzohet viza në rast se do të aplikojnë, për të marrë vizën për në SHBA.
