Pas blerjes së Bonucci-t nga Juventus, Milan po mendon të bëjë një tjetër transferim të bujshëm duke sjellë në “San Siro” një tjetër lojtar të madh.
Drejtuesit e Milanit, Marco Fassone dhe Massimiliano Mirabelli zhvilluan ditën e djeshme një takim në Londër me menaxherin e famshëm Jorge Mendes.
Sipas “Sky Sport”, dyshja e Milanit gjatë takimit u interesua te agjenti i Ronaldos në lidhje me ndonjë largim të mundshëm të yllit portugez nga Madridi.
Nëse do të arrihet marrëveshja atëherë Ronaldo pritet të kushtojë të paktën 200 milionë euro, ndërsa luzitanit do t’i ofrohet një pagë “faraonike” me vlerë 620 mijë euro në javë.
Kujtojmë që Cristiano Ronaldo dëshiron të largohet nga Real Madrid për shkak se është i pakënaqur në Spanjë pas akuzave për mashtrim tatimor.
