Jemin Gjana, Kryetari i Komisionit të Zgjedhjeve në PD, ka lëshuar akuza ndaj grupit të cilësuar kundër Bashës në Partinë Demokratike.
I ftuar në emisionin “Debati në Channel One”, Gjana e ka cilësuar të pamoralshme thirrjen që kanë bërë Jozefina Topalli, Besnik Mustafaj, Astrit Patozi, Arben Imami dhe të tjerë në zgjedhjet e 25 qershorit për të mos votuar PD-në por edhe për të bojkotuar zgjedhjet për kryetarin e PD më 22 korrik.
Sipas Gjanës, askush nuk i mbajti Mustafajn, Topallin, Patozin dhe Bregun të vinin të bëheshin pjesë e garës.
“A e dini ju që Besnik Mustafaj nuk është anëtar i Partisë Demokratike. Unë nuk e kuptoj se si një njeri që nuk ka teserën e kësaj partie, nuk e ka emrin në asnjë dokument anëtarësie të saj deklaron se nuk do votojë në zgjedhjet për kryetar. Në të gjithë karrierën e tij politike Mustafaj më rezulton se nuk ka plotësuar asnjë formular. Më kujtohet se në vitin 1998 kur Mustafaj erdhi nga Franca ku ishte ambasador, Berisha i propozoi të ishte sekretar për marrëdhëniet me jashtë në PD, por kjo duhej të votohej në Këshillin Kombëtar përmes një rregulli që minimumi ai duhej të ishte anëtar i PD-së. Pasi ia thamë këtë, Mustafaj kundërshtori dhe nuk pranoi të ishte anëtar i PD-së dhe të merrte teserën. Atëherë për këtë arsye ne u detyruam të bëjmë një ndryshim në statutin e Partisë Demokratike që sekretarin për marrëdhëniet me jashtë ta emëronte vetë kryetari, pra zoti Berisha dhe nuk ishte e nevojshme që ai të ishte anëtar i PD”, është shprehur Gjana.
Pas kësaj deklarate nuk ka munguar edhe përgjigjja nga Besnik Mustafaj.
“A e dini që Emin Gjana është kryetar i departamentit për vlerësimin e kontributeve historike, emëruar nga Basha? Me Eminin dhe kutinë e tij të zezë do e bëjë strategjinë e bashkimit Basha. Apo mendon se i mjafton Emini për ta asgjësuar historinë e PD-së? Emini si Emini, nuk i duket skuqja edhe kur thotë për mua se nuk jam anëar i PD-së”, ka shkruar Mustafaj.
