Christian Panucci është zyrtarisht trajner i Shqipërisë.
Tekniku Italian ka firmosur sot kontratën duke theksuar se objektivi i tij përgjatë kohës që do të drejtojë kuqezinjtë do të jetë Europiani i 2020-ës.
“Të jesh trajner i Shqipërisë është prestigj”, u shpreh Panucci, ndërsa theksoi se pas suksesit të mikut të tij De Biasi do të përpiqet të bëjë një tjetër histori me Kombëtaren e Shqiptare.
“Kërkoja diçka serioze për të nisur rrugëtimin tim dhe presidenti më bëri të ndihem shumë mirë në fjalët e para që tha edhe pse kishte shumë kandidatë të tjerë përveç meje. Do të punojmë fort për të shkuar në Europianin e 2020-ës. Gianni De Biasi, miku im, ka bërë punë të jashtëzakonshme, bëri histori në Shqipëri dhe tani është koha të bëjmë një gjë të re, do të provojmë të bëjmë një tjetër histori”, tha ai.
I pyetur nëse do të favorizohen lojtarët e kampionatit shqiptar duke i dhënë fund idesë se vetëm fubollistët që luajnë jashtë vendit kanë nivel të lartë, Panucci tha se do të jetë pjesë e Kombëtares Shqiptare çdokush që luan në nivelin që kërkon skuadra, pa pasur rëndësi se nga vjen.
Duka theksoi se Panucci është një nga emrat më të mëdhenj të futbollit europian i cili do bëjë të mundur që Shqipëria të jetë pjesë e Euro 2020.
“Kemi zgjedhur një nga emrat më të mëdhenj në futbollin Europian. Jam shumë i bindur që kemi bërë zgjedhjen më të mirë. Për mua është një trajner me një dëshirë të madhe, dhe besoj se bashkë me stafin e tij, do të bëjë të mundur që të jemi pjesë e Euro 2020”, tha Duka.
