Nga Klodian Tomorri
Në shoqërinë shqiptare po zë fill së fundmi një kulturë e frikshme kanibalizmi dhe nekrofilie.
Eshtë kultura e të uruarit të vdekjes dhe fatkeqësisë. Kjo është e tmerrshme dhe nuk është me një rast i izoluar, por po kthehet në traditë.
Nuk ka shoqëri në botë, ku urohet vdekja e njerëzve në aksident. Gjithandej të thonë shyqyr që shpëtove dhe të urojnë shërim. Nuk të thotë njeri “vdeksh!”.
Këtu po e bëjnë masivisht, jo vetëm një pjesë e publikut, por edhe përfaqësues të asaj që duhet të ishte elita intelektuale e njerëzve.
Para disa muajsh, shihje njerëz që uronin masivisht vdekjen e disa politikanëve shqiptarë, të cilët rastisën në Aeroportin e Stambollit gjatë një sulmi terrorist.
Kjo është e paprecedentë. Nuk e gjen as në fiset më primitive të planetit. Këtu po vdes njerëzillëku.
Të kesh preferenca dhe bindje politike është tërësisht normale. Të mos pajtohesh me mënyrën si qeveris kundërshtari yt politik dhe të luftosh për ta mundur atë është po ashtu plotësisht normale. Por të jesh nekrofil do të thotë se ke degraduar përfundimisht dhe nuk ke më asnjë vlerë njerëzore.
