Eurodeputeti sllovak Eduard Kukan tha se Parlamenti Evropian është duke ndjekur me vëmendje zhvilimet në Maqedoni, por dhe marrëdhëniet me Bullgarinë.
Në një bisedë me korrespondentin e MIA-s Kukan thotë se një interes i veçantë i kushtohet marrëdhënieve me fqinjët.
“Mendoj se kjo është strategjia e duhur, por nevojitet shumë durim dhe të mos dëmtohen interesat individualë. Unë i përshëndes iniciativat e reja me Bullgarinë, por e di se kjo është vlerësuar shumë lart. Në atë marrëveshje e cila duhet të nënshkruhet më 2 gusht ka dy çështje të ndjeshme, dy çështje shumë të vështira të cilat nuk janë zgjidhur. Çështja e gjuhës maqedonase, ku shumë veta në Bullgari thonë se është dialekt i gjuhës bullgare dhe e dyta se duhet që së bashku të festojnë ngjarje historike. Këto sipas meje janë çështje shumë delikate, janë çështje për të cilat nuk duhet të kihet vetëm iniciativë, por duhet që të ndiqen interesat vetjake të Maqedonisë”, tha Kukan.
