Sopranoja shqiptare, Ermonela Jaho, shkëlqeu me interpretimin e saj në operan “Madame Butterfly” në teatrin “Real” në Spanjë.
“Ajo arriti të njejtësohet aq shumë me veprën e Puçinit aq sa dukej sikur do të vdiste vërtet në skenë” – kështu e nis kritikën Ruben Amon në gazetën më të rëndësishme spanjolle, El Pais, duke analizuar operan “Madame Butterfly” ku Ermonela Jaho interpretoi në rolin kryesor për disa netë me radhë.
“Të qash në opera a është një dobësi?” – me këtë pyetje gazetari spanjoll fton audiencën të futet në thellësinë e një produksioni dhe interpretimi mbresëlënës të Ermonela Jahos në Teatrin Real në Madrid. “Ermonela Jaho e shndërron “Butterfly” në një epidemi lotësh, psherëtimash dhe emocionesh. A duhet të emocionohet një artist, apo kjo do ta çonte në një udhë humbjeje?” –shton kritiku.
Ky është vetëm një ekstrakt nga kritika e shkëlqyer që media spanjolle i ka dedikuar sopranos shqiptare pas suksesit në teatrin Real, ku opera u drejtua nga dirigjenti Marco Armiliato, ndërsa regjia nga Mario Gas.
“Është diçka e veçantë kur të falënderojnë në gjuhën tende. Faleminderit Spanja nga zemra për pritjen e ngrohtë” – shprehet sopranoja Ermonela Jaho në një postim në rrjetin social Facebook.
