OSHEE njofton se përveç thatësirës në kaskadën e Drinit, situata tranzitore me ministrat teknikë po mban të bllokuar një fond që Banka Botërore ka vënë në dispozicion të Korporatës Elektro-Energjetike për të blerë energji në kushtet e vështirësive hidrike si aktualisht.
Por OSHEE thotë se mund të përballojë me fondet e saj blerjen e sasisë së energjisë që nevojitet.
“Si rrjedhojë e politikës së fortë dhe strikte financat janë përmirësuar si rrjedhojë e kësaj nuk kemi nevojë ti drejtohemi buxhetit të shtetit apo të marrim overdraft dhe kredi të ndryshme, me financat e kompanisë do të mbulohet edhe kjo blerje”, shprehet Elton Sevrani, Divizioni Tregtar i OSHEE.
Niveli në liqenin e Fierzës ka zbritur në 272 m ndërsa prurjet janë tejet të ulëta. Korporata po prodhon për nevojat e OSHEE-së duke shfrytëzuar vetëm sasinë e prurjeve natyrale, me synim të mos ulë më tej nivelin e Kaskadës.
