Edi Rama po mendon për një prishtinali në krye të diplomacisë shqiptare. Mediat e paralajmërojnë një vendim të tillë të mundshëm të kryeministrit. Ka zëra se ai do të jetë Veton Surroi, shkrimtar, gazetar, publicist dhe ish-ligjvënës i Kosovës. Surroi është themelues i gazetës së përditshme më me peshë në mediat e Kosovës, “Koha Ditore”.
Mediat përmendin edhe emra të tjerë, por jo kaq shumë të dalluar si Baton Haxhiu, gazetar dhe mik intim i Edi Ramës, Vlora Çitaku, ambasadorja e Kosovës në SHBA apo edhe Mimoza Kusari Lila, e cila ka mbajtur postin e zëvendëskryeministres së Kosovës, ndërsa prej vitit 2013 është kryetare e Gjakovës.
Kurse Veton Surroi duket i përfshirë në situatën postzgjedhore në Shqipëri pasi ka shkruar edhe një editorial për fitoren e Edi Ramës. Ai e quan këtë triumf të pazakontë si “urban dhe estetik”, por shpjegon edhe problematikën e kësaj qeverisje, ku dominon kriminaliteti dhe droga. Ndër të tjera ai i sygjeron Ramës transformime të mëdha në këtë mandat dhe më i rëndësishmi sipas Surroit është:
“…transformimi më domethënës do të mundë të jetë ai prej politikanit të suksesshëm në burrë shteti…”
