Ka një lajm të mirë. Qysh nga dita e djeshme sosën sondazhet e opinionit publik. Tashmë na presin vetëm zgjedhjet e së djelës dhe sido që të shkojnë exit poll, ato nuk ndikojnë dot tek votuesit e lëkundur, por do të bëjnë tentativën e fundit për të manipuluar vullnetin e zgjedhësve.
Sondazhet e organizuara kësaj here ngulmuan të godasin votuesit e pavendosur, por mbi të gjitha u përpoqën të krijojnë një opinion të gabuar për situatën e vërtetë në elektoratin shqiptar. Ato ka shumë gjasa që të jenë një instrument i shkëlqyer për të futur duart në kutitë e votimit.
Duke marrë për bazë këto sondazhe, qëllimi është të ndërhyhet në kutitë e votimit ose para tyre për të deformuar vullnetin e zgjedhësve. Nesër pasnesër kushdo që do të ankohet për rezultatin e zgjedhjeve, fituesit mund t’ia thonë copë: “Edhe në sondazhe kështu dolët”.
Një nga sondazhet e djeshme ishte organizuar vetëm me 1200 telefonata, por përpiqej të nxirrte një përfundim kombëtar. Mos përzgjedhja e kampion-grupit në bazë të kritereve shkencore të Institutit të Statistikës ose organizatave të tilla të ngjashme e rrit shumë marzhin e gabimit.
Porosia e bërë drejtpërdrejtë në call center, e kthen sondazhin qysh në fillesë të gabuar. Përdorimi i telefonatave (vetëm celularë) e çon gabimin jo në +/- 2.5%, por deri në kufinjtë e 40%. Për ta bërë këtë analizë nuk duhet shkencë, por një kërkim i thjeshtë në google për metodologjinë e sondazheve.
Më pas ka të tjera llogari të bëra gabim që janë aritmetikë, jo statistikë. Fjala vjen një sondazh dje e nxirrte një parti me 5 për qind në kryeqytet, por i jepte vetëm një mandat. Me votat e Tiranës 5 për qind është pak më shumë se dy mandate. Partia në fjalë tubimin më të madh e ka me 82 vetë dhe gjithë fushatën e ka përqendruar në takime rastësore nëpër shitoret e Tiranës duke i pyetur sa është kilja e specit. Megjithatë kjo nuk ka rëndësi në këtë rast.
Ka një dëshirë për të paracaktuar rezultatin e zgjedhjeve para 25 qershorit, mundësisht koalicionin e ardhshëm. Historia e sondazheve shërben pikërisht për të krijuar këtë opinion dhe këtë ndjesi, por në fakt është një kambanë e fuqishme alarmi se ka forca të errëta që duan të manipulojnë zgjedhjet.
Kontestimi i këtyre matjeve të opinionit nuk duhet bërë vetëm për mungesën e theksuar të etikës parazgjedhore, por mbi të gjitha për rrezikshmërinë e madhe që i shfaqet demokracisë të djelën e zgjedhjeve.
Sondazhet janë alibia e vjedhjes së zgjedhjeve.
