Olli: Kemi çuar propozimet dhe kërkojmë thirrjen e menjëhershme
Këshilltarët e Partisë Demokratike në Bashkinë e Tiranës kërkuan të dielën mbledhje urgjente të Këshillit Bashkiak duke deklaruar se paketa fiskale e Erion Veliajt është e paligjshme. Në emër të këshilltarëve demokratë, kreu i tyre Leonard Olli përsëriti propozimin e bërë tashmë nga përfaqësuesit e PD-së për uljen e taksave, heqjen e taksës anti-kushtetuese për arsimin dhe heqjen e disa tarifave të vendosura nga Erion Veliaj, që rrënojnë biznesin e vogël dhe ekononimë familjare në Tiranë. “Ne sot jemi përpara një fakti të kryer kur bizneset janë gjunjëzuar në mungesën e plotë të transparencës. Ajo që ne u përpoqëm t’u përcillnim të gjithë grupeve të interesit në ato pak ditë që na u lanë në dispozicion ishte e pamjaftueshme dhe siç e kuptoni sot jemi para faktit që këto taksa jo vetëm nuk janë konsultuar siç e kërkon ligji, jo vetëm u kaluan në formën me abuzive me qëllimin e vetëm mbushjen e arkës së bashkisë duke mohuar çdo interes apo mundësie praktike të bizneseve, dhe kjo ka qënë arsyeja kryesore që ne përtej paketave që kemi paraqitur kërkuam gjykimin e kësaj çështje ne gjykimin administrativ sepse është Paketë Fiskale që ka kaluar në formë të paligjshme. Siç e keni dëgjuar nga deklaratat, kjo paketë nuk mund të hynte në fuqi para datës 1 mars. Pavarësisht kësaj ne kemi një qendrim konstant në këtë çështje. E kemi ngritur edhe para se biznesi të njihej realisht me faturat gjunjëzuese e vrastare të cilat po ndrydhin iniciativën e lirë, po ndryshin shpirtin e një shoqërie të bazuar në vlerat e një shoqërie perëndimore, dhe për këtë arsye të gjithë së bashku kërkojmë mbledhjen urgjente të Këshillit Bashkiak. Paketa Fiskale miratohet dhe konsultohet vetëm nga Këshilli Bashkiak. Të gjitha elementët e tjerë mund të bëhen transparentë e publik dhe jo në negociata thjeshtë në grupet e interesit në zyrën e kryetarit të Bashkisë por kjo mund të bëhet fare mirë duke mbledhur sa më parë mbledhjen e Këshillit me transparencë publike ku përtej propozimeve që ne kemi çuar për ulje me 30 % të të gjitha taksave, heqjen e taksës së infrastrukturës arsimore si një taksë antikushtetuese, kthimin e tarifave të tjera në nivelet e mëparshme dhe heqjen e 16 tarifave të tjera të cilat janë totalisht të pabazuara në ligj. Kemi çuar propozimet dhe kërkojmë thirrjen e menjëhershme”, tha kreu i këshilltarëve, Olli.
