Pas tërheqjes së kandidatit të PS-së nga zgjedhjet për Bashkinë e Kavajës, ka reaguar dhe kryetari i Partisë Demokratike, Lulzim Basha i cili e ka cilësuar një fitore të qytetarëve të Kavajës ndaj planit ogurzi të Edi Ramës.
“Falenderimi im është për qytetarët fisnikë të Kavajës, që vendosën tërheqjen e Edi Ramës nga plani ogurzi për të kthyer monizmin në qytetin që përmbysi diktaturën komuniste. Falenderoj ata qindra mijëra kavajas demokratë e luftëtarë të lirisë, që me qëndresën e tyre u bënë një barrierë psikologjike e pakapërcyeshme e planeve ogurzeza të mafias dhe krimit”, ka thënë Basha nga çadra e protestës.
Ai është shprehur se, qytetarët e Kavajës vendosën të refuzojnë fasadën e shëmtuar kriminale që iu ofroi Rilindja dhe Edi Rama më datë 7 maj.
“Edi Rama e njohu refuzimin tuaj masiv për të qenë pjesë e fasadës së diktuar nga krimi më 7 maj. Ky është paralajmërimi më i madh dhe kontributi i dytë historik që Kavaja jep për demokracinë e shqiptarëve”, ka thënë Basha.
