Nga Alba Haruni
Sot në sallën e Akademisë së Shkencave në Tiranë, u zhvillua ceremonia e prezantimit të librit studimor të studiuesit, etnografit dhe specialistit në fushën e etnologjisë sociale, të paharruarit z. Abaz Dojaka. Ky libër është një përmbledhje e një sërë punimeve të autorit, të cilat u sollën dhe u përpunuan për botim nga prof.Myzafer Korkuti, shok dhe mik i familjes Dojaka dhe Akademik i Shkencave në Tiranë.
Në libër trajtohen tema të ndryshme, për të cilat z. Dojaka kreu një sërë ekspeditash etnologjike në krahina të ndryshme të vendit , nga jugu në veri, nga lindja në perëndim. Të tilla janë si :” Enë e orendi të Dukagjinit”,”Enë e orendi të Labërisë”,” Pozitat e gruas në zonat malore të vendit”, Ekzogamia tek shqiptarët”,”Marrëdhëniet martesore në epikën legjendare”, “Ceremoniali i dasmës shqiptare”, “ Dasma Çame” e shumë punime të tjera sa interesante aq dhe të domosdoshme në punën e studiuesve dhe historianëve për studimet në vazhdim.
Një vend të vecantë në punimet e z. Abaz Dojaka zë dhe Camëria, bir i së cilës qe dhe vetë ai. Si themelues dhe kryetar i të parës shoqatë politike atdhetare, krijuar në fillimin e ’90, ai u bë një nga zërat më të fortë në mbrojtie dhe në përpjekie për zgjidhjen e çështjes çame.Në fjalën e mbajtur prej tij në krijimin e shoqatës ai shkruan: “Krijimi i Shoqatës Atdhetare “Camëria” është një ngjarje e madhe në historinë e krahinës sonë e të popullsisë së saj, sepse tani e tutje, bijtë e Çamërisë po marrin në dorë çështjen e tyre dhe do të luftojnë për zgjidhjen e drejtë të saj”.
Të pranishmit në këtë prezantim, studiues, historianë, kolegë, miq, familjarë, bashkëpatriotë, politikanë, sollën jo vetëm mbresat personale nga njohja dhe puna me zotin Abaz Dojaka, por ata promovuan dhe kujtuan me nderim, njeriun e ndershëm, studiuesin dhe kërkuesin e palodhur, patriotin e rrallë i cili la pas fjalën e mirë dhe “ kurorën” e punimeve të tij shkencore.
Ky takim shkencor dhe njerëzor u mbyll me një fjali kujtimore të Ali Mukës : “Abaz Dojakën unë e desha shumë, ne të gjithë e deshëm shumë, ne të gjithë do të vazhdojmë ta duam shumë.”
