Në Vlorë, në fund të shtatorit, do të nisë restaurimi i zonës historike të qytetit, në rrugën “Justin Godard” ku ndodhen dhe disa monumente kulture të kategorisë së parë. Për kryebashkiakun Dritan Leli, zona historike do të konceptohet si një e tërë, një pol që tregon histori, rikonfirmon vlera dhe njëkohësisht do shërbejë si qendër biznesi.
“Do të ketë shumë ndryshime, jo vetëm në drejtim të qarkullimit rrugor, por mbi të gjitha në konceptimin e zonës historike si një e tërë. Pra një pol që tregon histori, rikonfirmon vlera dhe njëkohësisht është një pol biznesi, për t’u shijuar nga qytetarët, nga përdoruesit e mjeteve dhe nga të gjithë ata, që do të vizitojnë Vlorën si një destinacion turistik”- u shpreh Leli.
Për të parë nga afër situatën në terren, kryebashkiaku ka shoqëruar këshilltarin e kryeministrit, arkitektin Artan Shkreli, i cili theksoi se Vlora nuk mund të jetë më qyteti historik, pa qendër historike.
