Kanë kaluar më shumë se 12 orë nga ekzekutimi i ish-zyrtarit të Policisë së Shtetit pranë banesës së tij në kryeqytet.
Mësohet se Artan Cuku është qëlluar 5 herë, 4 plumba i janë zbrazur në gjoks dhe një në kokë. Skena e vrasjes është kryer nga dy vrasës, njëri prej atentatorëve e ka pritur në hyrje të pallatit dhe tjetri ka qenë i fshehur brenda, i cili dyshohet të jetë autori i vrasjes. Plumbi në kokë ka qenë fatal pasi pas këtij plumbi, ish-zyrtari i policisë është shembur përtokë.
Pista kryesore ku policia dyshon për zbardhjen e vrasjes është vetëvrasja e një personi nga Tropoja pasi u thirr për të dëshmuar në zyrën e ish-zyrtarit të policisë.
Për ngjarjen janë shoqëruar disa persona por nuk dihet nëse ka të dyshuar mes tyre. Ndërkaq policia po rikontrollon vendngjarjen me dritë natyrale në kërkim të shenjave të mundshme të gishtave të lëna nga autorët brenda korridoreve të pallatit ku u vra Cuku.
Ndonëse grupi hetimor ka sekuestruar pamjet e kamerave të sigurisë të bizneseve pranë vendit të ngjarjes, ende nuk ka të dyshuar. Para ngjarjes mësohet 42-vjeçari ka qenë i ulur në një nga lokalet e zonës. Dyshimet e para në lidhje me motivin e ngjarjes janë ato të vrasjes për shkak të detyrës së tij si ish-punonjës policie.
