Kryetari i Partisë Demokratike, Lulzim Basha përsëriti se opozita nuk do të tërhiqet nga kërkesa e saj për qeveri teknike.
“Betejën e nisim në 18 shkurt do të vazhdojë deri në fitoren e plotë, deri në garantimin e zgjedhjeve të lira dhe të ndershme, përmes një qeverie teknike që do bëjë detyrën. Ky është mesazhi që përsëris sot, e kam thënë çdo ditë, për çdo qytetar, për çdo kënd që ka vesh të dëgjojë e mëndje të mendon”, tha Basha.
Në ditën e 42-të të protestës së opozitës Basha është shprehur se pas takimit në Maltë ku mori pjesë në takimin e Partisë Popullore Europiane ka marrë mbështetje për protestën.
“Asgjë nuk do të ndryshojë për sa kohë që krimi është në pushtet. Me këtë lëvizje madhështore popullore do të hapim një derë të re. Do e çlirojmë Shqipërinë nga zgjedha e krimit me zgjedhje të lira e të ndershme. Kjo është luftë për jetë a vdekje, do zgjedhim një Shqipëri evropiane apo Shqipëri të bërë zap nga krimi. Çdo kriminel do largohet nga funksionet publike para se në këtë vend të ketë zgjedhje”, tha Basha.
