Pas deklaratave të kryeministrit Edi Rama se PS mund të shkojë e vetme në zgjedhje, kryetari i PD-së, Lulzim Basha i është përgjigjur duke thënë se zgjedhje pa opozitën nuk do të ketë zgjedhje.
“Edi Rama dhe udhëheqësit e lartë të PS-së, pothuajse të gjithë funksionarë ose pinjollë të ish-elitës komuniste, ngatërrojnë dëshirat e tyre me vullnetin e popullit dhe identifikojnë karriken e tyre me demokracinë. Ata e kanë të vështirë të kuptojnë pluralizmin, të kuptojnë sovranitetin e qytetarëve mbi pushtetin e tyre. Trimat dhe trimëreshat socialiste, shërbëtorë të krimit por që ndihen padronë të popullit, duhet të kuptojnë se zgjedhje pa opozitën nuk mund të ketë, se qeverisje të dalë nga zgjedhje pa opozitën nuk mund të ketë”, ka thënë Basha.
Basha tha se opozita nuk ka asnjë ngut dhe asnjë mëdyshje në qendresën e saj, se zgjedhje të ndikuara apo të kontrolluara nga krimi nuk do të ketë.
“Zgjedhje me shërbëtorë të krimit në qeverisje nuk do të ketë. Zgjedhje me Edi Ramën kryeministër nuk do të ketë. Situata është e qartë dhe e thjeshtë: ne jemi me popullin, ata janë me krimin. Vetëm njerëzit me gjendje jo të kthjellët psiqike nuk e kuptojnë dot se cili do të jetë rezultati i kësaj përballjeje”, ka thënë Basha.
