Kryetari i Partisë Demokratike, Lulzim Basha e ka cilësuar “karikaturë të shëmtuar të Rilindjes” ndryshimin që po ndodh në qeveri.
Duke folur nga çadra e protestës, Basha tha se “…ajo që po ndodh pak metra më tutje është karikatura e një kryeqeveritari, i cili pasi ka braktisur premtimet me të cilat erdhi në pushtet, pasi ka ndërtuar një aleancë të rrezikshme me krimin, nuk po dëgjon as zërin e qytetarëve.”
Basha ritheksoi kërkesën për zgjedhje të lira dhe të ndershme të drejtuara nga një qeveri teknike.
“Ne nuk jemi mbledhur për koka turku, por për zgjedhjet e lira e të ndershme. Nuk jemi këtu për shërbëtorët e Edi Ramës, por kjo është një lëvizje deri në largimin e Edi Ramë”- shprehet Basha.
Basha shtoi se fajin nuk e kanë ministrat, por vetë Edi Rama: “Ne nuk ia vëmë fajin Lindita Nikollës a ndonjë tjetri për kanabizimin e vendit. Shqiptarët e dinë fare mirë se vendimet politike të Edi Ramës e kanë sjellë krimin në pushtet”.
