Sipas Bankës së Shqipërisë në 7 vjet interest kanë rënë me tre herë
Kriza ekonomike që çoi në pasiguri dhe rënien e kërkesës për kredi ka ndikuar edhe në rënien e interesave. Kreditë në lekë tashmë kanë interesat më të ulta që kanë patur ndonjëherë. Sipas Bankës së Shqipërisë në nëntor 2015, interesi mesatar i kredive të reja mujore në lekë, me afat maturimi mbi 5 vjet ra në 5.53%. Për të krahasuar rënien mjafton të kujtojmë që kreditë e këtij lloji në vitin 2009 e kanë patur normën e interesit 15%.
Rënia e interesave në lekë ka bërë që askush të mos ketë më hezitim për ta marrë kredinë në këtë monedhë, ndryshe nga se ndodhte më parë kur monedha e preferuar për kredi ishte euro, e stimuluar kjo edhe nga monedha me të cilat shiteshin banesat. Statistikat e Bankës së Shqipërisë e tregojnë qartë, që tendenca e kredisë për shtëpi është orientuar drejt lekut. Stoku i huasë në monedhë vendase ka shënuar rritje të vazhdueshme, duke arritur në 41.3 miliardë lekë në fund të nëntorit. Krahasuar me janarin 2009 ky stok është dyfishuar. Megjithatë ai është ndjeshëm më i ulët se stoku i kredisë në euro që megjithëse ka rënë me 8 për qind krahasuar me 2009, mbetet përsëri i lartë ose e thënë ndryshe ekuivalent me 60 miliardë lekë.
Sipas Bankës qëndrore, në betejën e tyre për të tërhequr klientë bankat e nivelit të dytë përvec uljes së normës së interesit, kanë vijuar të lehtësojnë standardet e kredive të akorduara individëve. Sipas vetë bankave, standardet rezultuan të lehtësuara si për kreditë për blerje banese, ashtu edhe për kreditë konsumatore. Por megjithë këto lëvizje kërkesa për kredi në ekonomi është e ulët, dhe shkak është pasiguria që ka sjellë kriza që po përjeton ekonomia e vendit.
