Shefja e BE për politikën e Jashtme, Federica Mogherini ka deklaruar se bojkoti i parlamentit do të thotë bllokim i krijimit të komisioneve të Vettingut dhe kjo ndal procesin e integrimit në BE.
Në përmbyllje të axhendës së vizitës në Shqipëri, zyrtarja e BE Federica Mogherini takoi kryeministrin Edi Rama, ku theksoi se vendi juaj ka mundësinë e vërtetë që të ecë përpara në rrugën drejt BE.
“Ne jemi gati, të çelim negociatat kur Vettingu të fillojë. E keni radhën ju, ne jemi të gatshëm ta shikojmë, të shohim ritimin e kësaj reforme”, u shpreh Mogherini.
“Edhe një fjalë të fundit për kolegët jo vetëm ata shqiptarë në Bruksel por edhe ata në Tiranë për punën e madhe që kanë bërë dhe për këtë kanë mbështetjen dhe besimin tim. Unë besoj që udhëheqja shqiptare do të shmangë humbjen e kohës në mënyrë që ta sillni Shqipërinë në BE”, tha Mogherini.
Pas takimit meshefen e BE, Rama tha se jemi në një mendje, që ndërkohë puna me 5 prioritetet kyçe duhet të vazhdojë intensivisht sepse do të na shoqërojnë edhe përtej hapjes së negociatave.
“Prekëm edhe çështje të natyrës rajonale, por për to të diskutojmë edhe në darkën e përbashkët të punës, pasi duke marrë në konsideratë edhe ngarkesën e ditës së sotme dhe emocionet e mbledhura ballkanike, e quaj të udhës ta ndaj në dy pjesë këtë bisedë, duke e diskutuar rajonin në tryezën e mikpritjes shqiptare” tha Rama.
