Gjobat e Bunk’art, për nxënësit e shkollave, punonjësit e institucioneve dhe reklama e muzeut të gënjeshtërt me paratë e taksapaguesve shqiptarë.
Pak ditë më parë, mediat kanë shkruar për një fenomen skandaloz që po ndodh në Bunk’art. Nxënës shkollash të sistemit publik janë detyruar të vizitojnë muzeun e Karlo Bolinos (Carlo Bollino) duke paguar 5 mijë lekë biletën. Të njëjtën gjobë, Bolino e ka adresuar edhe tek institucione të ndryshme shtetërore të orientuara me detyrim nga drejtuesit e tyre për të vizituar Bunk’artin. Ajo që është po kaq e patolerueshme, është se Bunk’art përfshihet në projektin e qeverisë për reklamimin e Shqipërisë turistike. Media të ndryshme jashtë vendit kanë nisur të referojnë Shqipërinë si një destinacion i preferuar turistik. Natyrisht që këto artikuj janë pjesë e fushatës që qeveria shqiptare ndërmerr për reklamimin e vlerave turistike të vendit tonë. Investimi me paratë e buxhetit për reklamimin e Shqipërisë turistike është normale. Por, kur në paketën e vendeve turistike përfshihet edhe Bunk’art, kjo nuk është më normale, është klientelizëm dhe korrupsion. Së fundmi, një artikull në “The telegraph”, rekomandohej të vizitohej edhe Bunk’art ndër vendet më atraktive në Shqipëri. Media prestigjioze rekomandon Bunk’art krahas objekteve me rëndësi historike e arkitektonike në Tiranë, si: Kulla e Sahatit në sheshin “Skënderbej”, Muzeun Historik Kombëtar, Xhaminë e Et’hem Beut. Kjo tregon se për të reklamuar Bunk’art janë dhënë para publike, pasi nuk mjaftoi që ai muze i gënjeshtërt të ngrihej me paratë e taksapaguesve shqiptarë.
Për ata që nuk e dinë, Bunk’art është një muze i ngritur me fondet e qeverisë shqiptare. Janë para të dhëna nga buxheti i shtetit, për sipërmarrësin italian, Karlo Bolino mbështetur në një marrëveshje të qeverisë shqiptare për një borxh të mbetur ndaj qeverisë italiane. Sipas marrëveshjes, paratë e borxhit i kalojnë kompanive italiane që operojnë në Shqipëri për të realizuar projekte, siç ishte edhe Bunk’art. Me pak fjalë, ky muze është ngritur fund e krye me paratë e taksapaguesve shqiptarë dhe të ardhurat që vijnë prej tij si muze, i kalojnë biznesmenit italian Karlo Bolino.
Përveçse është klient i kryeministrit, Karlo Bolino nuk është se ka ndonjë specifikë tjetër për t’u konsideruar e për ta pranuar si njeriun që po na tregon historinë tonë të zezë të komunizmit. Në të vërtetë ai ka mbledhur aty copëza të këmishave të grisura të viktimave të komunizmit, edhe të gjakosura, por mbi to nuk ka asnjë mbishkrim, nuk është emri i xhelatëve të tyre. Karlo Bolino i ka shërbyer kryeministrit, i cili me sa duket nuk ka qënë aspak i interesuar të mblidhte në atë muze copëza që formojnë mozaikun e plotë të krimeve të komunizmit. Jo, sepse ai i ka dekoruar xhelatët e s’mund të jenë në atë muze të krimeve të komunzimit. Është krejt tjetër histori kjo, por fakti që këtë banalitet, na e shet si historinë e krimeve të komunizmit, i detyron të rinjtë të shkojnë ta vizitojnë e të paguajnë para për një version të rremë të historisë, është tepër. Më keq akoma, kur Bunk’art e kalon propagandën shqiptare për të shkuar me “famën” e tij në mediat ndërkombëtare, atje ku me paratë e buxhetit të shtetit reklamohet Shqipëria turistike.
