Pas deklaratave të kryeministrit Rama për vetting-un, Kryetari i PD-së, Lulzim Basha, tha se është absurde të mendosh se një Kryeministër që kriminalizoi deri në palcë Kuvendin e Shqipërisë, të jetë i interesuar për gjyqtarë dhe prokurorë të ndershëm.
Basha tha se vetting do të ketë, vetëm pas krijimit të qeverisë teknike.
“Po do të ketë vetting! Vetting-u do kalojë një ditë pas rrëzimit të republikës së vjetër një ditë pas rrëzimit të qeverisë së bandave dhe kryeministrit të bandave dhe një qeverie që garanton zgjedhje të lira dhe të ndershme“, tha Basha.
Basha tha se shoqëria civile paguhet me miliona që të shërbejë si fasadë për këtë pushtet të korruptuar e të lidhur me krimin.
Lideri i opozitës tha se vetting-u do të vazhdojë si e kemi përcaktuar më 22 korrik, jo si e do Rama, Tahiri dhe Veliaj për t’u mbrojtur, por vetting të vërtetë si e duan qytetarët shqiptarë. Sipas tij, nuk ka vend për mosnjohje të problemit.
