Eurodeputetja, Monica Macovei: Zbatimi i reformës në drejtësi, sfida e vështirë për Shqipërinë
Drejtuesja e Komitetit të përbashkët të Stabilizim-Asociimit me Shqipërinë, eurodeputetja rumune Monica Macovei, tha sot se, vetëm kur të ndëshkohen me burg funksionarë apo ish-funksionarë të lartë, atëherë do të hapen zyrtarisht negociatat e anëtarësimit. Deklarata e eurodeputetes Macovei vjen në prag të votimit në seancën plenare të Parlamentit Europian të projektrezolutës për Shqipërinë.
“Duhet të nisim negociatat me Reformën në Drejtësi, sepse përbën sfidën më të vështirë për ju. Nëse Shqipëria përparon në këtë drejtim, nuk do të ketë pengesa për hapjen zyrtare të negociatave. Por e kuptoj se është shumë e vështirë të vihet drejtësi. Ne kemi shumë ligje si ‘vetting’-u, ku problemi kryesor mbetet zbatimi praktik. Do të ndërtoni një zyrë të prokurorit antikorrupsion. Por themelore mbetet se kush do të punojë aty, sepse vetëm njerëzit e aftë mund të sjellin ndryshime”, thotë Macovei.
