Kryetari i Kuvendit e vlerëson si çështje proceduriale vonesën e dekretimit të ministrave të rinj nga ana e presidentit Nishani
Kryetari i Kuvendit, Ilir Meta, foli sot për shkarkimin e ministrit të Financave dhe emërimet e reja në qeveri. Për Metën gjithmonë ka nevojë për impulse të reja në qeveri, parlament e kudo, por për të rëndësi kanë rezultatet dhe jo emrat e ministrave që ndërrohen.
“Jam i bindur se gjithmonë ka nevojë për përmirësim, për punën e qeverisë në punë e parlamentit në punën e të gjithëve dhe gjithnjë ka nevojë për impulse të reja. Por ndonjëherë këtu ndahemi bashkë se ju, te çdo impuls shikoni një person ndërsa unë shikoj rezultate të larta, motivim më të madhe dhe realizim të objektivave të qeverisë”, tha Meta.
Ndërkohë që presidenti Nishani ka dekretuar shkarkimet e dy ministrave por jo emërimet e reja në këto poste, për Metën kjo është vetëm çështje proceduariale dhe jo problem mes institucioneve.” Nuk jam ende i njohur me vendimin përfundimtar. Megjithatë dihet se përpara se të bëhen dekretet e emërimit bëhen ato të shkarkimit. Kështu që besoj se është çështje procedure”, tha Meta.
Dy ditë më parë, kryeministri Rama shkarkoi Shkëlqim Canin nga detyra e ministrit të Financave dhe në vënd të tij emëroi Arben Ahmetajn. Në vënd të Ahmetajt në ministrinë e Ekonomisë u emërua Milva Ekonomi, e cila mbante deri tani postin e zëvëndësministres së Shëndetësisë.
