Një shpërthim me tritol ka ndodhur gjatë orëve të para të mëngjesit të sotëm në qytetin e Vlorës.
Ngjarja ka ndodhur rreth orës 03:30 minuta në lagjen “Pavarësia” të qytetit. Poshtë automjetit në pronësi të 46 vjeçarit, Flamur Peçaj është vendosur një sasi tritoli ende e pa përcaktuar. Lënda shpërthyese është e prodhuar në mënyrë artizanale dhe e ndezur me një fitil.
Automjeti tip Audi Q7 ka qenë i parkuar poshtë pallatit të pronarit në kohën e shpërthimit dhe brenda tij nuk ka pasur asnjë person. Burime nga policia bëjnë me dije se shpërthimi ka qenë i fuqishëm dhe ka dëmtuar edhe orenditë shtëpiake të banorëve të katit të parë të pallatit, ndërsa pronari i automjetit banon në katin e gjashtë të tij.
Sipas policisë tritoli është vendosur me qëllim për të shkatërruar plotësisht mjetin dhe për t’i dhënë mesazh pronarit.
46-vjeçari Flamur Peçaj është një emër i njohur për autoritetet, pasi rezulton me precedentë penalë. Në vitin 2012, ai është arrestuar nga policia pasi ka kërcënuar dy vëllezër me armë zjarri. Këta të fundit janë hakmarrë, duke e rrahur me sende të forta dhe me qytë armësh. Në atë kohë, Peçaj përfundoi në spital për shkak të plagëve.
Në vendngjarje kanë mbërritur menjëherë zjarrëfikësja e cila ka bërë të mundur shuarjen e menjëhershme të flakëve dhe policia e cila po heton mbi shkaqet e ngjarjes dhe identifikimin e autorëve.
