Nga Alket Veliu
Ata ushtarë janë krenarë që janë shqiptarë duke përdorur një simbol kombëtar dhe janë po aq krenarë që janë pjesë e ushtrisë greke duke mbajtur uniformën e vendit, ku u rritën.
Shteti shqiptar është krenar për djemtë shqiptarë që janë pjesë e ushtrisë amerikane, kanadeze, si edhe greke për kontributin që këta djem japin si pjesë e një ushtrie të NATO-s, ndërkohë që ministri i mbrojtjes grek kërcënon këta djem për të vetmen arsye se ata tregojnë që janë shqiptarë.
Shteti shqiptar nuk ka lejuar kurrë që ushtarët e Republikës së Shqipërisë të promovojnë pretendime territoriale ndaj fqinjëve apo hartën e Shqipërisë së Madhe, ndërkohë që ministri i mbrojtjes fqinj me hakmarrjen e tij primitive tregoi sa i vogël është, ndërsa promovon në radhët e ushtrisë së vet pretendime territoriale.
Nuk kemi dëgjuar kurrë nga radhët e ushtrisë shqiptare këngë ofensive dhe luftënxitëse ndaj fqinjëve, kurse pak vite më parë ushtarët grekë bënin parada duke kënduar si do therrnin shqiptarët.
Gjatë luftës të stërgjatë civile greke dhe pas Luftës së Dytë Botërore, udhëheqësit ushtarakë fqinj treguan se janë të aftë të kryejnë krime mes vetes duke prerë kokat e njëri-tjetrit si trofe, por fatkeqësisht shikojmë që edhe 70 vjet më pas, Kammenos promovon një ushtri të NATO-s që si trofe ka koka të prera.
Duke parë marrëdhëniet shumë të mira të shqiptarëve me minoritetin grek, duke parë marrëdhëniet e emigrantëve shqiptarë me vendasit grekë dhe integrimin e tyre në shoqërinë e atjeshme, duke parë nivelin e lartë të marrëdhënieve në biznes mes dy vendeve tona kuptojmë fare mirë sa vite prapa dhe sa të vegjël janë politikanët apo ministra të sojit Kammenos, të cilët përdorin nacionalizmin për pushtet politik apo për një post ministri.
