Ambasadori amerikan Donald Lu i cilëson reformën në drejtësi dhe zgjedhjet e përgjithshme të qershorit si dy sfidat kryesore të Shqipërisë për këtë vit
Në forumin e Humaniteteve gjatë një bisede me studentë dhe pedagogë tek Fakulteti i Historisë, Lu theksoi se ky vit që kemi përpara është “plot me sfida kur bëhet fjalë për zbatimin e reformës në drejtësi dhe zgjedhjet kombëtare.”
Duke folur për reformën në drejtësi në Shqipëri, Ambasadori Lu theksoi se populli shqiptar e kërkon dhe e mbështet këtë reformë.
Sa i takon politikës e administratës së re në Shtetet e Bashkuara të Amerikës, ambasadori vuri në dukje se “Shtëpia e Bardhë e ka përkufizuar qëllimin e politikës së jashtme të Presidentit si të qëndrueshme, për një botë më të paqtë, me më pak konflikte dhe më shumë interesa të përbashkëta.”
Ambasadori Lu gjithashtu vuri në dukje se ShBA do të inkurajonte më shumë kontribute nga të gjithë anëtarët e aleancës në lidhje me NATO-n.
Ambasadori theksoi gjithashtu se shkatërrimi i ISIS është përcaktuar si një nga prioritetet kryesore të politikës së jashtme, një qëllim të cilin ne e ndajmë me mbi gjashtëdhjetë vende të tjera të koalicionit kundër ISIS-it, duke përfshirë edhe Shqipërinë.
