Kryetari i PD, Lulzim Basha, ka kërcënuar se opozita nuk do të hyjë në zgjedhjet e ardhëshme, me Ramën kryeministër. Në një intervistë për “5 pyetje nga Babaramo”, Basha tha se zgjedhjet e parakohshme janë e vetmja kundërpërgjigje ndaj një qeverie që sipas tij është e korruptuar dhe që e ka zhytur vendin në varfëri. Basha foli edhe për strehimin e muxhahedinëve në vendin tonë duke e cilësuar si një hap pozitiv. Ai thekson se për zhvendosjen e tyre në Shqipëri është arritur marrëveshja me SHBA-në që në kohën e qeverisë së djathtë që drejtohej nga Sali Berisha.
Në një tjetër ekran, kryetari i PD-së tha sot se, kur sekretari amerikan i Shtetit deklaroi se Shqipëria po ecën në drejtimin e duhur,i referohet arritjeve të vendit gjatë qeverisjes demokrate. I ftuar në emisionin “Top Story”, në Top Channel, kryetari i PD-së tha se Kerry nuk vlerësoi qeverisjen aktuale.
“Të krahasosh Shqipërinë sot, me atë të dalë nga komunizmi sigurisht që janë arritje të mëdha. Çdo arritje e madhe meritë e Partisë Demokratike në pushtet. Anëtarësimi në NATO, heqja e vizave dhe statusi kandidat kanë ndodhur në kohën e Partisë Demokratike në pushtet. Ky është realiteti.”, tha Basha.
Për takimin që pati me sekretarin amerikan të Shtetit, Basha tha se, takimi me një zyrtar kaq të lartë amerikan, është tregues i besimit tek opozita nga aleati strategjik i Shqipërisë.
“Takimi me Xhon Keryn ishte një takim zyrtar 35-minutësh, ku kruetari i opozitës ishte së bashku me 4 bashkëpunëtorë të afërt. Kjo tregon besimin e një figure kaq të lartë tek PD”, tha Basha.
