“Gjate dy viteve të fundit, Shqipëria ka strehuar rreth 1000 muxhahedinë si dhe ka rënë dakord për të strehuar dhe 2000 të tjerë”
Zëri i Amerikës, raporton se Sekretari Amerikan i Shtetit John Kerry, vizitoi Tiranën për të falenderuar qeverinë shqiptare e cila ka marrë përsipër strehimin e 2 mijë muxhahedinëve. Zëri i Amerikës i referohet një zyrtari të Departamentit Anmerikan të Shtetit, i cili ka theksuar se ishte rënë dakord më heret që të mos citohej publikisht kjo marrëveshje, ndërkohë që Shqipëria kishte strehuar më parë 1000 muxhahedinë dhe me ardhjene 2 mijë të tjerëve shkon në tre mijë numri i tyre në Shqipëri.
“Gjate dy viteve të fundit, Shqipëria ka strehuar rreth 1000 muxhahedinë si dhe ka rënë dakord për të strehuar dhe 2000 të tjerë”, ka thënë për Zërin e Amerikës një zyrtar i lartë i Departamentit Amerikan të Shtetit.Ndërkaq, pas përfundimit të takimeve në Tiranë, Departamenti Amerikan i Shtetit në profilin e tij në “Facebook”, i ka kushtuar një rëndësi jo të vogël, vizitës së Sekretarit Kerry në Shqipëri.
Kanë qenë tre postime me përshkrimet përkatëse, të cilat kanë shërbyer dhe si një përmbledhje e të gjithë takimeve dhe mesazheve të dhëna nga Sekretari John Kerry gjatë qëndrimit në Tiranë.
Takimi me Presidentin Nishani në aeroport, deklarata e përbashkët me Kryeministrin Rama, e në fund një album fotografish të çdo etape të qëndrimit të Sekretarit Kerry në Tiranë, shoqëruar me thënien e tij se “Shqipëria mund të mbështetet plotësisht në miqësinë dhe përkrahjen e qytetarëve dhe qeverisë së Shteteve të Bashkuara të Amerikës”.
