Kompania e britanike pasi mbylli kontratën me doganat publikon fakte të kontrabandës me karburantet
Tregu shqiptar i karburanteve ka prani të lartë të mallit të kontrabanduar si edhe fshehje të tjera. Faktet i ka sjellë kompania britanike Crown Agents pasi mbylli kontratën me qeverinë shqiptare për asistencë në dogana.
Format e kontrabandës së karburanteve janë të larmishme dhe prekin si mallrat e importit ashtu edhe prodhimin e vendit i cili në shumë raste nuk deklarohet duke ju fshehur taksave por edhe duke prishur konkurencën e tregut dhe cilësinë e mallit.
Ekspertët e Crown Agents vitin që shkoi kanë zbuluar se anijet e flotës shqiptare të peshkimit përdoreshin për importimin e sasive të mëdha të karburantit ‘duty free’ të ardhur nga portet e Italisë, Malit të Zi dhe Greqisë. Të dhënat e marra nga Porti i Durrësit, Vlorës, Shëngjinit dhe Sarandës kanë treguar që nga 1 janari deri më 12 mars 2015, kishin hyrë rreth 2 milionë litra karburant ‘duty free’, me çmim shumë herë më të ulët se sa ai i tregut shqiptar.
Pas këtij zbulimi ka dalë një udhëzim që i detyronte pronarët e anijeve të peshkimit të regjistroheshin si taksapagues, të depozitonin një deklaratë doganore dhe të paguanin TVSH-në për çdo lloj karburanti të huaj ‘duty free’. Kjo ka sjellë sipas Crown Agents rënie drastike të fenomenit të furnizimit të anijeve shqiptare të peshkimit me karburant nga vende të tjera.
Po aq skandaloze ka qenë edhe fshehja e taksave me naftën prodhim vendi. Crown Agents deklaron se ka sjellë ekspertë afat-shkurtër shtesë për të kontrolluar kompanitë kryesore prodhuese, dhe marrëdhënien e tyre me doganat. Janë kryer kontrolle të autoboteve në rrugë si edhe depozitat e paregjistruara të karburantit. Kompania britanike thotë se më mjë periudhë të shkurtër ka zbuluar më tepër se 120 raste të karburantit të tregtuar jo në përputhje me ligjin, në një total prej më tepër se 48,000 litra.
