Një darkë e tillë mund të ketë ngjarë pak ditë pasi Selami debatoi me kryetarin e PD-së Lulzim Basha në grupin parlamentar demokrat
I shoqëruar nga bashkëshortja e tij, gazetarja Ilva Tare, Eduard Selami është parë të hyjë në pallatin e ish-kryeministrit Berisha, darkën e së premtes. Me gjasë ai ka qenë i ftuar për darkë në familjen Berisha. Nëse kjo është e vërtetë, kjo ftesë vjen pak ditë pasi në mbledhjen e grupit parlamentar të PD-së, Selami iu kundërvu kryetarit Basha për qëndrimet që ky i fundit po mban për çështje të rëndësishme. Selami ka reaguar ashpër ndaj kryetarit Basha, duke i thënë atij se nuk ishte serioz me qëndrimet e PD-së për Byronë e Hetimit apo Reformën në Drejtësi dhe se nuk pyet grupin parlamentar dhe forumet për qëndrimet që deklaron në publik për çështje të rëndësishme.
Detaj interesant është se Selami ka qenë i shoqëruar nga bashkëshortja Ilva Tare. Gazetarja e ka zemëruar pak vite më parë ish-kryeministrin Berisha me një reportazh në Al Jazira për ngjarjen e Gërdecit.
Pas këtij reportazhi Berisha ka refuzuar gjithmonë të shkojë në studion e Ilva Tares.
