Pas deklaratave të kryeministrit të ardhshëm të Greqisë, Micotaqis që Çështja Çame nuk ekziston, ligjvënësja e PDIU-së, Mesila Doda ka reaguar sërish, duke bërë një reflektim të shkurtër mbi politikanët shqiptarë.
Sipas saj, nëse klasa politike greke qëndron e bashkuar në marrinë e vet nacionaliste dhe anti-europiane, në Shqipëri ka politikanë që për “inat të sime vjehrre, shkoj e fle me mullixhiun”.
Shënimi i Mesila Dodës:
Të gjithë krahët politikë në Greqinë “europiane” sillen njësoj, arrogantë e meskinë. Vazhdojnë mohojnë një krim të spastrimit etnik dhe në këtë absurditet janë të gjithë bashkë, qeveri dhe opozitë…
Vetëm në Shqipëri ndodh që një pjesë e politikës vrapon të mbështesë fqinjin në sjelljet e tij arrogante e antishqiptare, me shpresë se do godasë kundërshtarin politik.
Kjo është dhe arsyeja pse sot jemi të ndarë e të prapambetur. Një klasë politike, e cila nuk sheh më larg se hunda e vet.
