Distria Krasniqi ka shkëlqyer në Kampionatin Evropian të Xhudos, duke siguruar një vend në finale në eventin që po zhvillohet në Tbilisi, mes mbi 400 sportistëve nga 46 vende.
Xhudistja pejane e nisi garën me dominim në kategorinë deri në 52 kilogramë, duke kaluar me sukses xhiron e dytë ndaj Tereza Bodnarova, të cilën e mposhti me “waza-ari”.
Forma e saj e shkëlqyer vazhdoi edhe në çerekfinale, ku triumfoi bindshëm ndaj Aleksandra Kaleta, duke siguruar një vend në gjysmëfinale.
Në këtë fazë, Krasniqi tregoi edhe një herë klasin e saj, duke eliminuar italianen Odette Giuffrida dhe duke prerë biletën për në finalen e madhe.
Tashmë, Distria është vetëm një hap larg medaljes së artë, teksa në finale do të përballet me francezen Amandine Buchard.
Distria Krasniqi konfirmon edhe një herë statusin e saj si një nga emrat më të mëdhenj të xhudos evropiane.
