Deputeti i Partisë Demokratike, Belind Këlliçi, ka reaguar përmes një statusi në rrjetin social Facebook lidhur me ngjarjen e rëndë të zjarrit në një kompleks banimi në kryeqytet, duke akuzuar drejtpërdrejt kryeministrin Edi Rama dhe kryebashkiakun Erion Veliaj si përgjegjës për situatën.
Sipas Këlliçit, zjarri i ndodhur në një zonë të populluar të Tiranës, ku dhjetëra banorë rrezikuan jetën dhe pësuan dëme materiale, duhet të hetohet me urgjencë dhe seriozitet nga organet e drejtësisë. Ai kërkoi që përgjegjësit në çdo nivel të identifikohen dhe të vihen menjëherë përpara ligjit.
Në deklaratën e tij, deputeti theksoi se përgjegjësit kryesorë të kësaj “katastrofe” janë Rama dhe Veliaj, të cilët kanë ndërtuar një sistem që favorizon ndërtimet masive për përfitime financiare, pa marrë në konsideratë sigurinë dhe cilësinë e jetës së qytetarëve.
Këlliçi akuzoi gjithashtu për krijimin e një “industrie betoni” që, sipas tij, ka pushtuar hapësirat publike dhe nuk garanton standardet bazë të sigurisë, duke vënë në rrezik jetën e banorëve.
Në fund, Këlliçi bëri thirrje për përgjegjësi politike nga kryeministri Rama dhe ftoi qytetarët të bashkohen në protestën e paralajmëruar për të premten, më 17 prill, në orën 19:00, duke ftuar qytetarët të reagojnë ndaj situatës.
Reagimi
Ka dy përgjegjës për katastrofën dje në Tiranë, Edi Rama dhe Erion Veliaj!
Ngjarja e rëndë dje në një zonë shumë të banuar në mes të Tiranës, ku dhjetra banorë rrezikuan jetën dhe humbën pasurinë për shkak të zjarrit që pushtoi një kompleks për disa orë, duhet të hetohet me seriozitet dhe me shpejtësi nga Prokuroria. Të dalin shkelësit në secilën hallkë dhe të vihen para drejtësisë menjëherë!
Pavarësisht kësaj, çdo qytetar e di sot se dy njerëz janë përgjegjësit kryesorë të asaj katastrofe, Edi Rama dhe Erion Veliaj. Eshtë prej dorës së tyre, prej urdhrave të tyre që është ngritur ky sistem, me ndërtime për të marrë sa më shumë para dhe pa pasur parasysh interesat e qytetarëve, sigurinë e cilësinë e tyre të jetës.
Edi Rama dhe Erion Veliaj kanë ngritur industrinë e betonit, që ka zaptuar çdo hapësirë, për të kënaqur klientët e për të shtuar pasurinë e tyre.
Një industri kriminale që nuk ofron elementët bazike të sigurisë për njerëzit, ku duhet sakrifica e heroizmi nga disa zjarrfikës e punonjës policie për të evituar tragjedinë.
Kur Erion Veliaj dhe Edi Rama e lejojnë të njëjtin ndërtues (famozin Armand Lilo) të shtojë 7 kate pa leje mu para zyrës së Kryebashkiakut, në mes të sheshit Skënderbej, a presin vallë qytetarët që bashkia dhe qeveria të kenë ushtruar kontroll për standardet e lejes, apo të cilësisë së punimeve në një kompleks banimi?!
Unë nxis hetim serioz e të plotë nga Prokuroria. Por është e qartë se autorët kryesorë të kësaj maskarade, janë mbi ligjin dhe nuk do të hetohen.
Edi Rama duhet të mbajë përgjegjësi para qytetarëve.
Dhe pasnesër, të premten, datë 17 prill, në orën 19:00, është dita që qytetarët ta bëjnë atë përgjegjës për këtë dramë e shumë të tjera që ai po i shkakton vendit.
