Kryeministri Edi Rama ka dalë dje me një deklaratë kontradiktore sa i përket besimit të tij. Teksa po jepte një intervistë për Top Channel në lidhje me librin e tij të botuar së fundmi, “Në Sofrën e Hënës”, Rama është pyetur në lidhje me besimin e tij në Zot.
Rama ka theksuar se e ka shumë vështirë që të pranojë se beson, pasi sipas tij kjo është shumë personale.
“Unë asnjëherë nuk e kam ndierë veten rehat për të folur për diçka kaq personale sa ç’është besimi në këtë aspekt. Nuk jam me siguri një njeri që frekuentoj tempuj, natyrisht i shoh me shumë respekt, me shumë kuriozitet, por nuk është se i frekuentoj. Por kur vjen puna tek vetë besimi, nuk ndihem rehat të flas sepse është diçka e vështirë për t’u treguar sepse është shumë personale. Njerëzit e shohin dhe e kuptojnë ekzistencën e diçkaje që thuhet në emra të ndryshëm, por në të gjitha rastet ka një emërues të përbashkët besimin tek një fuqi, tek një energji, tek një hapësirë jashtë vetes. Kështu që e kam të vështirë shumë të flas për të,” tha Rama.
Por ajo që bën përshtypje në deklaratat e Ramës është se me një fjalë ka mohuar deklaratat e mëparshme të vetat por dhe besimin e tij. Disa vite më parë, Rama po në të njejtin televizion, ka pranuar se është pagëzuar nga gjyshja e tij me një Kishë Katolike dhe se emrin e pagëzimit e ka Paulin.
“Gjyshja me kishte pagëzuar natën me një prift dhe unë emrin e pagëzimit e kam Paulin që është emri i xhaxhait, i cili vdiq shumë i ri nga një aneurizëm e zemrës” tha Rama në “E Diell”.
Por e njëjta gjë ka ndodhur me Ramën në një intervistë tjetër televizive po në vitin 2021, por këtë herë e ka quajtur veten si një lider musliman.
“Unë jam lider mysliman,” thotë Rama pasi u pyet për kundërshtarin e atij të atëhershëm Lulzim Bashën.
Mesa duket kjo deklaratë e Ramës ditën e sotme duke mohuar besimin, ka hedhur poshtë dhe deklaratat e veta, të cilat dhe më parë kishin kontraditat e veta.
