Në fjalën e tij në mbledhjen e grupit parlamentar të PD, lideri demokrat Sali Berisha u shpreh se Rama po nxjerr veten e tij mbi ligjin, duke devijuar orientimin kryesor 33-vjeçar të shqiptarëve drejt Europës.
“Por, jemi edhe më të vendosur se kurrë që qytetarët shqiptarë t’i dalin zot vetes dhe të marrin fatet e tyre në dorë. Ftoj çdo qytetar të përmbushë detyrimin e tij ndaj vetes, ndaj dinjitetit të tij, personalitetit të ti”, u shpreh ndër të tjera Berisha.
Pjesë nga deklarata
Shqipëria, më shumë se çdo vend tjetër, duhet ta pranojmë, e ka pasur dhe e ka jetik procesin e integrimit. Kemi pasur një të shkuar tmerrësisht të dhimbshme. 500 vjet në Perandorinë Osmane. Pastaj në diktaturën staliniste oruelliane.
Pra, de facto që nëse ka pasur një pjesë territori të Europës të shkëputur nga Europa për shekuj, ka qenë Shqipëria. Nuk mund ta mohojmë këtë ne, çfarë do të thotë se është interes jetik për vendin të mbyllë procesin e integrimit. Ta mbyllë mbi bazë meritash, merita të zbatimit të ligjeve, Kushtetutës dhe standardeve dhe kritereve evropiane për qytetarët shqiptarë. Pra, hyn në një stad të ri, hyn në një fazë të re veprimi kundër shqiptarëve i regjimit të Edi Ramës. Jo vetëm veten e nxjerr mbi ligjin, por tani devijon edhe orientimin kryesor 33-vjeçar të shqiptarëve drejt Europës.
Dhe e bën këtë pa pyetur asnjë njeri. Pa pyetur asnjë institucion sepse ndjehet patron siç është i të gjithë infrastrukturës së narkoshtetit. Kjo dëshmon se jemi në një kohë shumë të vështirë, në një kohë kritike për vendin.
Por, jemi edhe më të vendosur se kurrë që qytetarët shqiptarë t’i dalin zot vetes dhe të marrin fatet e tyre në dorë. Ftoj çdo qytetar të përmbushë detyrimin e tij ndaj vetes, ndaj dinjitetit të tij, personalitetit të tij.
Nuk mund të pranojë kurrë një njeri i qytetëruar, një njeri i përgjegjshëm të qeveriset nga një padrino që asgjëson drejtësinë, që e vjedh dhe pastaj i thotë vjedhja nuk është krim. Është për qytetarin, por jo për shtetarin,’ tha Berisha.
Kryedemokrati ka njoftuar edhedatën e protestës së radhës, kundër Edi Ramës.
Në një konferencë për mediat, Berisha bëri me dije se protesta do të mbahet më 12 mars.
Sipas tij, opozita do ti përgjigjet në mënyrën më të fuqishme qeverisë që, siç thotë ai, është mbuluar nga skandalet.
“Tani Rama nxorri mburojën e Beogradit përpara, na thotë se nuk na duhet Brukseli, por Beogradi dhe kthehet në skenarët anti shqitparë. Nuk ka komb në botë që do duronte një njeri si ky, kurrë! Akti i fundit me Sllobodanin e ri, Aleksandar Vucic, është një thirrje për atdhetarinë e cdo shqiptari, ky ka shndërruar Shqipërinë në një vend të rrezikshëm për kombin, për të ardhmen e kombit, duke përdorur pushtetin e tij, ndaj duhet të përgjigjemi në mënyrën më të fuqishme dhe kam besim se do i përgjigjemi. Data 12 është kryengritja e radhës”,- është shprehur Berisha.
