Në Gjirokastër ka shpërthyer një skandal i rëndë, ku një 12-vjeçare dyshohet se është abuzuar seksualisht nga bashkëjetuesi i së ëmës, Kelmend Krusa. Në një reagim të parë për mediat, nëna e vajzës ka mohuar që partneri i saj të ketë kryer ndonjë akt ndaj të bijës, duke deklaruar se nuk ka patur asnjëherë probleme me të dhe se denoncimi i vajzës është i pabazë. Ajo shton se bashkëjetuesi nuk ka bërë asgjë ndaj fëmijës dhe se nuk kishte dijeni për pretendimet e ngritura.
“Unë jetoja me Kelmendin, nuk kemi patur probleme asnjëherë. Policia ka ardhur na ka kontrolluar shtëpinë dhe pastaj na ka shoqëruar. Unë nuk kam bërë denoncim sepse ai nuk i ka bërë asgjë vajzës. Janë të gjitha gënjeshtra. Nuk kam as dyshime mbi këtë gjë. Denoncimin e ka bërë vajza për ngacmim seksual, jo për përdhunim” tha ajo.
Ngjarja merr dimension edhe më tronditës, pasi Krusa dyshohet të jetë përfshirë më parë në vrasjen e babait të 12-vjeçares, ngjarje që ndodhi disa vite më parë në Dibër. Pas zhdukjes së bashkëshortit të saj në vitin 2018 dhe gjetjes së tij të vrarë, nëna e vajzës u largua në Gjirokastër duke marrë fëmijët dhe duke bashkëjetuar me Krusën, i cili rezulton të jetë edhe kushëri me viktimat e mëparshme.
Historia përfshin elemente të dhunës, abuzimit dhe lidhjeve të afërta familjare, duke e bërë të jashtëzakonshme dhe tronditëse. Trupi i pajetë i Artur Lleshit, babait të vajzës, ishte gjetur në dhjetor të vitit 2018 në një tunel në fshatin Gjuras të Bulqizës, rreth 9 muaj pas zhdukjes së tij.
