Për herë të parë, Bashkimi Europian përmend drejtpërdrejt SPAK-un dhe shpreh shqetësim për “përpjekje të shtuara dhe shqetësuese” nga politikanë dhe zyrtarë, “përfshirë nivele të larta”, për të ushtruar ndikim të padrejtë mbi institucionet e drejtësisë.
Në raport theksohet se Kuvendi dhe në veçanti qeveria duhet të përmbahen e të mos ndërhyjnë në institucionet e drejtësisë duke mos i lejuar që të zbatojnë vendimet e Gjykatës Kushtetuese dhe standardet evropiane, veçanërisht ato të përcaktuara nga Komisioni i Venecias, lidhur me imunitetin.
Kjo pikë lidhet drejtpërdrejtë me imunitetin e ish zëvendës kryeministres dhe ish-ministres Belinda Balluku, pasi me forcën e kartonëve mazhoranca refuzoi heqjen e imunitetit çka i hapte rrugë arrestimit të saj, pas kërkesës së depozituar nga Prokuroria e Posaçme.
Në raport është ashpërsuar edhe gjuha për korrupsionin. Në draftin e shkurtit, korrupsioni konsiderohej “shqetësim serioz”. Në versionin e majit, ai quhet “shqetësim vendimtar”, një nga formulimet më të rënda që përdor zakonisht diplomacia europiane.
Raporti thekson se Shqipëria duhet të përmirësojë ndjeshëm lirinë e medias, transparencën e pronësisë së mediave dhe mbrojtjen e gazetarëve nga sulmet. BE vlerëson bashkëpunimin e Shqipërisë me Europol, Frontex dhe shtetet e BE-së kundër krimit të organizuar.
Nga ana tjetër kërkohet rritje e rezultateve në luftën kundër trafikut të drogës, pastrimit të parave, trafikut të qenieve njerëzore, armëve dhe krimit kibernetik. Raporti kërkon gjithashtu kontroll më të fortë të kufijve dhe përafrim të plotë të politikës së vizave me BE-në.
Sipas vendeve anëtare të BE në këtë raport, Shqipëria është “në rrugën e duhur” për t’u bërë ekonomi funksionale tregu, por problemet me informalitetin, pronat dhe administratën vazhdojnë të pengojnë zhvillimin.
Raporti kërkon reformim më të thellë të administratës publike, rritje të transparencës dhe përmirësim të shërbimeve digjitale për qytetarët.
gijotina.com/
