Për aq kohë sa përdorimi i inteligjencës artificiale nga të rinjtë është i pashmangshëm, sfida nuk është më ndalimi i saj, por edukimi për ta përdorur në mënyrën e duhur.
Ruajtja e etikës, zhvillimi i mendimit kritik dhe përdorimi i përgjegjshëm janë thelbësore për ta arritur këtë, dhe për këtë arsye Ministria e Arsimit ka vendosur të ndërhyjë përmes ndryshimit të kurrikulave shkollore.
Përmes planit të veprimit të Agjendës Digjitale për Arsimin 2025-2030, synohet nxitja e përdorimit të AI në institucionet arsimore për mësim të personalizuar.
Nxënësit e gjimnazit “Qemal Stafa”, të cilët po ndjekin një projekt pilot për inteligjencën artificiale pas orarit zyrtar të mësimit, tregojnë se ky program u ka sjellë përfitime konkrete.
” Atëherë unë inteligjencën artificiale e përdor kryesisht për qëllime studimore. Ushtrimet zakonisht për shembull i bëj vetë edhe mund të përdor një inteligjencë artificiale për t’i korrigjuar, për të shikuar ku i kam bërë gabimin, jo t’i marrë të gatshme direkt.” tha Denis Prendi, nxënës i klasës 12.
“Pjesa e klubit inteligjencës artificiale më ka ndihmuar sepse na ka bërë që të njihemi më shumë me problemet, të zhvillojmë atë pjesën e zhvillimit të mendimit tonë, sepse normalisht të kodosh e programosh nuk është vetëm që të shkruash disa linja kodi, por është edhe të mendosh dhe të ndjekësh një algoritëm të caktuar” u shpreh Suar Lile, nxënës i klasës 10.
Disa prej nxënësve kanë arritur të krijojnë programe të ndryshme që mund t’u shërbejnë edhe bashkëmoshatarëve të tyre, si chatbote për lëndë shkollore apo aplikacione edukative.
“Në pjesëmarrje të shumta që unë kam pasur në aktivitete dhe në konkurse të ndryshme, unë kam krijuar disa platforma pra që më janë dhënë disa situata reale dhe ne kemi gjetur një zgjidhje. Nëpërmjet këtyre platformave ne synojmë që të sjellim një inovacion”, u shpreh Israjla Kërkuti, nxënëse e klasës 11.
Edhe për mësuesit, integrimi i teknologjisë së avancuar në kurrikula është i domosdoshëm.
“Ajo që është më e rëndësishme në këtë projekt është se gjatë gjithë kohës flitet për etikën, rolin që ka etika në çfarëdo lloj projekti ose në çfarëdolloj drejtimi që ne zgjedhim që të punojmë. Kështu që kjo është shumë e rëndësishme sepse i bën nxënësit të ndërgjegjësohen për të qenë korrekt me çdo gjë ose me çdo informim që ato marrin dhe që duan të zhvillojnë. Ashtu si kundër ka bërë dhe inteligjenca që ka dhënë zgjidhje, por çdo zgjidhje që ajo ka ofruar ka shfaqur problematika të cilat këtu mundohemi që t’i detajojmë në mënyrë të tillë që nxënësit të mos merren gjatë gjithë kohës duke shfrytëzuar inteligjencën artificiale, por të jenë ata që e shfrytëzojnë inteligjencën artificiale”, tha Elena Sulo mësuese.
Në Planin e Veprimit e ministritë së arsimit parashikohet zhvillimi dhe zbatimi i udhëzimeve dhe rasteve praktike për përdorimin e AI së gjeneruese (GenAI), ndërsa brenda pesë viteve lënda e TIK-ut të ndërthurë edhe njohuri mbi inteligjencën. Plani përfshin edhe trajnime të detyrueshme për të gjithë mësuesit e sistemit parauniversitar në fushën e pedagogjisë digjitale./report.tv
The post Inteligjenca Artificiale, Ministria e Arsimit: Do të jetë pjesë e kurrikulës në shkolla appeared first on 27.
