Gjykata e Lartë ka rrëzuar rekursin e bërë nga ish-deputeti i PD-së, Ervin Salianji duke lënë në fuqi dënimin me burg politik ndaj tij. Vendimi u mor këtë të martë. Po ashtu gjykata nuk pranoi as kërkesën e gazetarit Jetmir Olldashi.
Gjykata shqyrtoi sot prej orës 10:00 rekursin e ish-deputetit të PD-së, Ervin Salianji. Ai kërkoi rrëzimin e dënimit të tij me 1 vit heqje lirie nga Gjykata e Apelit të Tiranës në 27 Shtator 2024.
Salianji, i cili po vuan dënimin në burgun e Fierit u shpall fajtor për kallëzim të rremë, në lidhje me një denoncim për vëllain trafikant të ish-ministrit të Brendshëm Fatmir Xhafaj.
Pas vendimit të Gjykatës së Lartë që i rrëzoi rekursin, ka reaguar vetë ish-deputeti i Partisë Demokratike, Ervin Salianji.
Ai u shpreh jo i habitur nga vendimi i Gjykatës së Lartë. Ndër të tjera thekson se çështjen do ta çojë deri në Gjykatën e Srasburgut.
“Unë do të luftoj e do ta kërkoj të drejtën deri në fund. Shqipëria do të jetë një vend më i mirë kur të ketë drejtësi, kur Gjykatat do të kenë kurajon të japin drejtësi edhe kur kjo nuk i pelqen autokratit”, shkruan Salianji në një postim nërrjetet sociale.
Edhe Partia Demokratike ka reaguar me një deklaratë zyrtare të nënkryetarit Luciano Boçi, duke u shprehur se Gjykata e Lartë mori sot vendim për të vazhduar me “shtrembërimin e drejtësisë” dhe përdorimin e saj politik, duke lënë në burg Salianjin, deputet i cili, prej tetorit të vitit të kaluar, është mbajtur në burgun e Fierit me një urdhër politik të zbatuar nga atë që ai i referon si “drejtësia politike” e dyshes Rama-Xhafaj.
