Deputeti socialist i bashkohet opozitës: Dëmton trashëgiminë kulturore dhe kanionet e jashtëzakonshme që ka ajo zonë
Deputeti i PS-së, Fatmir Toçi, është shprehur kundër ndërtimit të Hidrocentralit të Nivicës duke argumentuar se dëmton trashëgiminë kulturore të vendit. Gjatë debatit në komisionin parlamentar të Medias, Toçi tha se “Janë të gjitha gjasat që ky Hidrocentral nuk do të bëhet jo thjesht për banesat historike që kanë vlerën e tyre dhe një tjetër Monument Kulture që është kalaja e Nivicës, aty afër. Por mbi të gjitha bëhet fjalë për kanionet e jashtëzakonshme që ka ajo zonë që mund të kenë një zhvillim parësor të turizmit në këtë zonë”.
E pranishme në këtë mbledhje, Ministraj e Kulturës Mirela Kumbaro tha se është dhënë një leje e tillë pasi kjo ministri nuk jep leje por ka sqaruar më tej se: Nuk kemi dëmtim në gjurmën e propozuar, nuk ka Monumente të Kulturës”.
Kreu demokrat i Komisionit të Medias, Genc Pollo, tha se Ministria e Kulturës ka qënë në dijeni të HEC-it që po ndërtohet në Nivicë, por një gjë e tillë është hedhur poshtë nga Ministrja Kumbaro, e cila theksoi se leje për ndërtimin e HEC-eve janë dhënë në një kohë kur qeveriste PD.
