Në Maratonën “Tirana 2016”, aktiviteti sportiv i organizuar nga Bashkia e Tiranës, morën pjesë 1200 vrapues. Fillimi i maratonës u bë tek Muzeu Historik, vijoi përgjatë rrugës së Durrësit, rrugës “Dritan Hoxha” duke përfunduar në autostradën Tiranë-Durrës, në mbikalimin e Rinasit.
Në maratonë morën pjesë autoritete të ndryshme nga Tirana, nga viset shqiptare si kryetarja e Komunës së Gjakovës, Mimoza Kusari Lila si dhe kreu i Aleancës për Ardhmërinë e Kosovës, Ramush Haradinaj. Në distancën 21km për meshkuj u shpall fitues Ilir Këllezi ndërsa për femra vrapuesja e njohur Luiza Gega.
Në vrapim u përfshinë 4 kategori; nxënësit e shkollave të mesme, personat paraplegjikë, vrapimi 10 km dhe vrapimi tjetër me një distancë 21 km për shqiptarët dhe huaj. 3 fituesit e vendeve të para në maratonë u shpërblyen me një shumë monetare prej 50, 30 dhe 20 mijë lekësh.
Kryebashkiaku Erion Veliaj i cili garoi në disiplinën 10km tha se ishte renditur i 500-600-ti.
Veliaj: “Kjo ishte më e vështirë se fushata. Fushata fitohet më kollaj se një maratonë. Nuk e di i sati kam dalë, i 500 apo i 600, por gjithmonë duhet të marrësh pjesë. Sot qyteti është realisht evropian. Të gjithë të huajt që morën pjesë thanë se një gjë të tillë nuk e kemi parë në asnjë vend të Ballkanit.”
