Tirana duket se po kthehet në ditët e veta të mira, duke vënë kandidaturën për t’u bashkuar me grupin e skuadrave pretendente. Pas katër barazimeve në po aq javë të kampionatit, një prej të cilave të arritur në derbin e “Elbasan Arena”, ndaj Partizanit, bardheblutë e kanë shkatërruar Flamurtarin me rezultatin 3-0. Tirana ka dominuar dhunshëm ndaj skuadrës së ish-trajnerit të saj, Gugash Magani, ndërkohë që Taku ishte i mrekullueshëm, duke u bërë autori i dy golave, ndërsa vlonjatët bënë shumë pak për të kundërshtuar vendasit. Vetëm në fillim të takimit rezikuan dy herë seriozisht portën e Likës, por Bushiç, sado në formë të mirë të jetë, gjithmonë e ka të vështirë ta gjejë golin.
Nga ndeshja e sotme Teuta – Korabi (2-3)
Ndërkohë në Durrës është Korabi që ka bërë mrekullinë, duke fituar 3-2 ndaj Teutës vendase dhe duke e zhytur atë në një krizë të thellë. Plaku, Nexhipi dhe Kaja janë autorët e golave për dibranët, ndërsa Tatik dhe Kotobelli kanë shënuar dy golat e parë për Teutën në këtë kampionat, por që gjithsesi nuk kanë vlejtur për të përfituar qoftë edhe një pikë.
Rezultatet/ Java V
Skënderbeu – Vllaznia 3-0
Luftëtari – Laçi 1-0
Kukësi – Partizani 1-0
Teuta – Korabi 2-3
Tirana – Flamurtari 3-0
